დოდოთის ცხრაკარა

დოდოთის ცხრაკარა — X საუკუნის დასაწყისის ქართული ხუროთმოძღვრების ძეგლი, ქართული მართლმადიდებლური ეკლესია, ქურთის მუნიციპალიტეტის (2008 წლიდან ოკუპირებულია რუსეთის ფედერაციის მიერ) ტერიტორიაზე, სოფელ ზემო დოდოთის მახლობლად, ფრონის ხეობაში.

ეკლესია ძლიერ დაზიანებულია. გეგმით დარბაზულ ეკლესიაა გარშემოსავლელით. ნაგებია სუფთად გათლილი ღვინისფერი ქვის კვადრების სწორი რიგებით, ურევია უხეშად დამუშავებული სხვადასხვა ზომის ქვებიც. სამხრეთის კარი შემკულია მოჩუქურთმებული სათაურით. კარის გვერდზე ამოკვეთილი ქართული ასომთავრული წარწერიდან ჩანს, რომ ეკლესია X საუკუნის დასაწყისში აუგია ტბელ ერისთავს ივანეს. X საუკუნის დასასრულს ან XI საუკუნის დასაწყისში კი მისთვის ქავთარ ტბელს გარშემოსავლელი მიუშენებია, რაც იმაზე მიუთითებს, რომ დოდოთი ტბელ ფეოდალთა სამფლობელოს შემადგენლობაში შედიოდა.

განსაკუთრებითაა გამოყოფილი გარშემოსავლელის სამხრეთ ნაწილში არსებული ორმალიანი თაღოვანი შესასვლელი. თაღებს შორის მრგვალი სვეტია, რომელიც მოჩუქურთმებული კაპიტელითაა დასრულებული. შესასვლელი შიგნითაც და გარედანაც უხვადაა მოჩუქურთმებული გეომ. და სტილიზებული მცენარეული ორნამენტით. ასევე იყო მორთული დასავლეთი შესასვლელიც. დოდოთის ეკლესიის გარშემოსავლელის ჩუქურთმები შესრულების ხარისხითა და სირთულით გამოირჩევა მთლიანი ეკლესიის მორთულობისაგან.

ლიტერატურა

• მეფისაშვილი რ., ცინცაძე ვ., ენციკლოპედია „საქართველო“, ტ. 2, თბ., 2012. — გვ. ?.