In Concert with The London Symphony Orchestra (აგრეთვე ცნობილი როგორც In Concert with The London Symphony Orchestra Conducted by Paul Mann) — ინგლისური მძიმე როკ-ჯგუფ Deep Purple-ის საკონცერტო ალბომი და DVD, ჩაწერილი 1999 წლის 25 და 26 სექტემბერს, ლონდონის ალბერტ ჰოლში, ლონდონის სიმფონიური ორკესტრის მონაწილეობით. CD ვერსია გამოიცა 2000 წლის 8 თებერვალს, ხოლო DVD - იმავე წლის 25 ივლისს.
თავდაპირველად ამ კონცერტის ჩანაფიქრის ავტორი იყო ჯონ ლორდი, რომელსაც სურდა 1969 წლის ნოვატორული ალბომის Concerto for Group and Orchestra მასალის კვლავ შესრულება. ერთ-ერთი მოყვარულის დახმარებით, რომელიც მუსიკათმცოდნე და კომპოზიტორი იყო, მოხდა დაკარგული პარტიტურის აღდგენა. ჯონის იდეით, ჯგუფი უნდა გამოსულიყო კვლავ როიალ ალბერტ ჰოლში, ამჯერად - ლონდონის სიმფონიური ორკესტრის (და არა სამეფო ფილარმონიული ორკესტრის) თანხლებით. დირიჟორად აირჩიეს პოლ მენი (წინა იყო მალკოლმ არნოლდი).
კონცერტებზე შესრულდა ჯგუფის წევრების კარიერის სოლო-კომპოზიციები და Deep Purple-ის ცნობილი სიმღერები. მოწვეული სტუმრების სახით კონცერტებში მონაწილეობდნენ რონი ჯეიმზ დიო, სტივ მორსის საკუთარი ბენდი და სემ ბრაუნი. 2001 წელს მსგავსი კონცერტები გაიმართა ტოკიოში და შეტანილი იქნა ბოქს-სეტში The Soundboard Series.